כה וַיְצַ֤ו מֹשֶׁה֙ אֶת־הַלְוִיִּ֔ם נֹ֥שְׂאֵ֛י אֲר֥וֹן בְּרִית־יְהוָ֖ה לֵאמֹֽר׃
כו לָקֹ֗חַ אֵ֣ת סֵ֤פֶר הַתּוֹרָה֙ הַזֶּ֔ה וְשַׂמְתֶּ֣ם אֹת֔וֹ מִצַּ֛ד אֲר֥וֹן בְּרִית־יְהוָ֖ה אֱלֹֽהֵיכֶ֑ם וְהָֽיָה־שָׁ֥ם בְּךָ֖ לְעֵֽד׃
(כו) לקח - כמו, "זָכוֹר" (שמות כ, ח), "שמור" (דברים ה, יב) "הלוך" (שמואל ב ג, כד):
מצד ארון ברית ה' - נחלקו בו חכמי ישראל בבבא בתרא (יד, ב), יש מהם אומרים, "דף היה בולט מן הארון מבחוץ, ושם היה מונח". ויש אומרים, "מצד הלוחות היה מונח, בתוך הארון":
כז כִּ֣י אָֽנֹכִ֤י יָדַ֨עְתִּי֙ אֶֽת־מֶרְיְךָ֔ וְאֶֽת־עָרְפְּךָ֖ הַקָּשֶׁ֑ה הֵ֣ן בְּעוֹדֶנִּי֩ חַ֨י עִמָּכֶ֜ם הַיּ֗וֹם מַמְרִ֤ים הֱיִתֶם֙ עִם־יְהוָ֔ה וְאַ֖ף כִּֽי־אַחֲרֵ֥י מוֹתִֽי׃
כח הַקְהִ֧ילוּ אֵלַ֛י אֶת־כָּל־זִקְנֵ֥י שִׁבְטֵיכֶ֖ם וְשֹֽׁטְרֵיכֶ֑ם וַֽאֲדַבְּרָ֣ה בְאָזְנֵיהֶ֗ם אֵ֚ת הַדְּבָרִ֣ים הָאֵ֔לֶּה וְאָעִ֣ידָה בָּ֔ם אֶת־הַשָּׁמַ֖יִם וְאֶת־הָאָֽרֶץ׃
(כח) הקהילו אלי - ולא תקעו אותו היום בחצוצרות, להקהיל את הקהל. לפי שנאמר, (במדבר י, ב) "עשה לך". ולא השליט יהושע עליהם, בחייו של משה. ואף בחייו, נגנזו קודם יום מותו. לקיים מה שנאמר, (קהלת ח, ח) "ואין שלטון ביום המות":
ואעידה בם את השמים ואת הארץ - ואם תאמר הרי כבר העיד למעלה (לעיל דברים ל, יט) "העידותי בכם היום" וגו'? התם לישראל, אמר, אבל לשמים ולארץ, לא אמר. ועכשיו בא לומר, "האזינו השמים" וגו': (דברים לב, א)
כט כִּ֣י יָדַ֗עְתִּי אַֽחֲרֵ֤י מוֹתִי֙ כִּֽי־הַשְׁחֵ֣ת תַּשְׁחִת֔וּן וְסַרְתֶּ֣ם מִן־הַדֶּ֔רֶךְ אֲשֶׁ֥ר צִוִּ֖יתִי אֶתְכֶ֑ם וְקָרָ֨את אֶתְכֶ֤ם הָֽרָעָה֙ בְּאַֽחֲרִ֣ית הַיָּמִ֔ים כִּֽי־תַעֲשׂ֤וּ אֶת־הָרַע֙ בְּעֵינֵ֣י יְהוָ֔ה לְהַכְעִיס֖וֹ בְּמַֽעֲשֵׂ֥ה יְדֵיכֶֽם׃
(כט) אחרי מותי כי השחת תשחתון - והרי כל ימי יהושע לא השחיתו? שנאמר, (יהושע כד, לא)" ויעבדו בני ישראל את ה' כל ימי יהושע". מכאן שתלמידו של אדם חביב עליו כגופו. שכל זמן שיהושע חי נראה למשה כאלו הוא חי.
ל וַיְדַבֵּ֣ר מֹשֶׁ֗ה בְּאָזְנֵי֙ כָּל־קְהַ֣ל יִשְׂרָאֵ֔ל אֶת־דִּבְרֵ֥י הַשִּׁירָ֖ה הַזֹּ֑את עַ֖ד תֻּמָּֽם׃ {ש}