טו רְאֵ֨ה נָתַ֤תִּי לְפָנֶ֨יךָ֙ הַיּ֔וֹם אֶת־הַֽחַיִּ֖ים וְאֶת־הַטּ֑וֹב וְאֶת־הַמָּ֖וֶת וְאֶת־הָרָֽע׃

(טו) את החיים ואת הטוב - זה תלוי בזה. אם תעשה טוב, הרי לך חיים. ואם תעשה רע, הרי לך המות. והכתוב מפרש והולך היאך:

טז אֲשֶׁ֨ר אָֽנֹכִ֣י מְצַוְּךָ֮ הַיּוֹם֒ לְאַֽהֲבָ֞ה אֶת־יְהוָ֤ה אֱלֹהֶ֨יךָ֙ לָלֶ֣כֶת בִּדְרָכָ֔יו וְלִשְׁמֹ֛ר מִצְוֹתָ֥יו וְחֻקֹּתָ֖יו וּמִשְׁפָּטָ֑יו וְחָיִ֣יתָ וְרָבִ֔יתָ וּבֵֽרַכְךָ֙ יְהוָ֣ה אֱלֹהֶ֔יךָ בָּאָ֕רֶץ אֲשֶׁר־אַתָּ֥ה בָא־שָׁ֖מָּה לְרִשְׁתָּֽהּ׃

(טז) אשר אנכי מצוך היום לאהבה - הרי הטוב, ובו תלוי:

וחיית ורבית - הרי החיים:

יז וְאִם־יִפְנֶ֥ה לְבָֽבְךָ֖ וְלֹ֣א תִשְׁמָ֑ע וְנִדַּחְתָּ֗ וְהִֽשְׁתַּחֲוִ֛יתָ לֵֽאלֹהִ֥ים אֲחֵרִ֖ים וַֽעֲבַדְתָּֽם׃

(יז) ואם יפנה לבבך - הרי הרע:

יח הִגַּ֤דְתִּי לָכֶם֙ הַיּ֔וֹם כִּ֥י אָבֹ֖ד תֹּֽאבֵד֑וּן לֹֽא־תַאֲרִיכֻ֤ן יָמִים֙ עַל־הָ֣אֲדָמָ֔ה אֲשֶׁ֨ר אַתָּ֤ה עֹבֵר֙ אֶת־הַיַּרְדֵּ֔ן לָב֥וֹא שָׁ֖מָּה לְרִשְׁתָּֽהּ׃

(יח) כי אבד תאבדון - הרי המות:

יט הַֽעִדֹ֨תִי בָכֶ֣ם הַיּוֹם֮^[1] אֶת־הַשָּׁמַ֣יִם וְאֶת־הָאָרֶץ֒ הַֽחַיִּ֤ים וְהַמָּ֨וֶת֙ נָתַ֣תִּי לְפָנֶ֔יךָ הַבְּרָכָ֖ה וְהַקְּלָלָ֑ה וּבָֽחַרְתָּ֙ בַּֽחַיִּ֔ים לְמַ֥עַן תִּֽחְיֶ֖ה אַתָּ֥ה וְזַרְעֶֽךָ׃

(יט) העדתי בכם היום את השמים ואת הארץ - שהם קיימים לעולם.  וכאשר תקרה אתכם הרעה, יהיו עדים, שאני התרתי בכם בכל זאת. דבר אחר: העידתי בכם היום את השמים וגו' - אמר להם הקב"ה לישראל: הסתכלו בשמים שבראתי לשמש אתכם. שמא שנו את מדתם? שמא לא עלה גלגל חמה מן המזרח והאיר לכל העולם?! כענין שנאמר, (קהלת א, ה) "וזרח השמש ובא השמש". הסתכלו בארץ שבראתי לשמש אתכם. שמא שנתה מדתה?! שמא זרעתם אותה ולא צמחה?! ו שמא זרעתם חטים והעלתה שעורים?! ומה אלו שנעשו לא לשכר ולא להפסד. אם זוכין אין מקבלין שכר. ואם חוטאין, אין מקבלין פורענות. לא שנו את מדתם. אתם, שאם זכיתם, תקבלו שכר. ואם חטאתם, תקבלו פורענות. על אחת כמה וכמה! 

ובחרת בחיים - אני מורה לכם שתבחרו בחלק החיים. כאדם האומר לחברו, בחר לך חלק יפה בנחלתי. ומעמידו על חלק היפה, ואומר לו, את זה ברור לך. ועל זה נאמר, (תהילים טז, ה) "ה' מנת חלקי וכוסי, אתה תומיך גורלי". הנחת ידי על גורל הטוב, לומר, את זה קח לך:

[רש"י דברים לא, כח] [רש"י דברים לב, א]

כ לְאַֽהֲבָה֙ אֶת־יְהוָ֣ה אֱלֹהֶ֔יךָ לִשְׁמֹ֥עַ בְּקֹל֖וֹ וּלְדָבְקָה־ב֑וֹ כִּ֣י ה֤וּא חַיֶּ֨יךָ֙ וְאֹ֣רֶךְ יָמֶ֔יךָ לָשֶׁ֣בֶת עַל־הָֽאֲדָמָ֗ה אֲשֶׁר֩ נִשְׁבַּ֨ע יְהוָ֧ה לַֽאֲבֹתֶ֛יךָ לְאַבְרָהָ֛ם לְיִצְחָ֥ק וּֽלְיַעֲקֹ֖ב לָתֵ֥ת לָהֶֽם׃ {פ}