יד וַיְהִ֕י כְּב֥וֹא אַבְרָ֖ם מִצְרָ֑יְמָה וַיִּרְא֤וּ הַמִּצְרִים֙ אֶת־הָ֣אִשָּׁ֔ה כִּֽי־יָפָ֥ה הִ֖וא מְאֹֽד׃
(יד) ויהי כבוא אברם מצרימה - היה לו לומר "כבואם מצרימה"? אלא למד, שהטמין אותה בתיבה, וע"י שתבעו את המכס, פתחו וראו אותה:
טו וַיִּרְא֤וּ אֹתָהּ֙ שָׂרֵ֣י פַרְעֹ֔ה וַיְהַֽלְל֥וּ אֹתָ֖הּ אֶל־פַּרְעֹ֑ה וַתֻּקַּ֥ח הָֽאִשָּׁ֖ה בֵּ֥ית פַּרְעֹֽה׃
(טו) ויהללו אותה אל פרעה - הללוה ביניהם, לומר, הגונה זו למלך:
טז וּלְאַבְרָ֥ם הֵיטִ֖יב בַּֽעֲבוּרָ֑הּ וַֽיְהִי־ל֤וֹ צֹאן־וּבָקָר֙ וַֽחֲמֹרִ֔ים וַֽעֲבָדִים֙ וּשְׁפָחֹ֔ת וַֽאֲתֹנֹ֖ת וּגְמַלִּֽים׃
(טז) ולאברם היטיב - פרעה בעבורה:
יז וַיְנַגַּ֨ע יְהוָ֧ה ׀ אֶת־פַּרְעֹ֛ה נְגָעִ֥ים גְּדֹלִ֖ים וְאֶת־בֵּית֑וֹ עַל־דְּבַ֥ר שָׂרַ֖י אֵ֥שֶׁת אַבְרָֽם׃
(יז) וינגע ה' וגו' - במכת ראתן לקה, שהתשמיש קשה לו (ב"ר):
ואת ביתו - כתרגומו, "ועל אנש ביתיה". (ומדרשו, לרבות כותליו, ועמודיו, וכליו. ברש"י ישן):
על דבר שרי - ע"פ דבורה, אומרת למלאך הך, והוא מכה:
יח וַיִּקְרָ֤א פַרְעֹה֙ לְאַבְרָ֔ם וַיֹּ֕אמֶר מַה־זֹּ֖את עָשִׂ֣יתָ לִּ֑י לָ֚מָּה לֹֽא־הִגַּ֣דְתָּ לִּ֔י כִּ֥י אִשְׁתְּךָ֖ הִֽוא׃
יט לָמָ֤ה אָמַ֨רְתָּ֙ אֲחֹ֣תִי הִ֔וא[1] וָֽאֶקַּ֥ח אֹתָ֛הּ לִ֖י לְאִשָּׁ֑ה וְעַתָּ֕ה הִנֵּ֥ה אִשְׁתְּךָ֖ קַ֥ח וָלֵֽךְ[2]׃
(יט) קח ולך - לא כאבימלך שא"ל, "הנה ארצי לפניך" (בראשית כ, טו). אלא א"ל, "לך", ואל תעמוד. שהמצרים שטופי זמה הם. שנא', (יחזקאל כג, כ) "וזרמת סוסים זרמתם":
כ וַיְצַ֥ו עָלָ֛יו פַּרְעֹ֖ה אֲנָשִׁ֑ים וַֽיְשַׁלְּח֥וּ אֹת֛וֹ וְאֶת־אִשְׁתּ֖וֹ וְאֶת־כָּל־אֲשֶׁר־לֽוֹ׃
(כ) ויצו עליו - על אודותיו לשלחו ולשמרו:
וישלחו - כתרגומו, "ואלויאו".
בראשית פרק יג
א וַיַּעַל֩ אַבְרָ֨ם מִמִּצְרַ֜יִם ה֠וּא וְאִשְׁתּ֧וֹ וְכָל־אֲשֶׁר־ל֛וֹ וְל֥וֹט עִמּ֖וֹ הַנֶּֽגְבָּה׃
(א) ויעל אברם וגו' הנגבה - לבא לדרומה של ארץ ישראל. כמו שאמור למעלה (יב, ט) "הלוך ונסוע הנגבה", להר המוריה. ומכל מקום כשהוא הולך ממצרים לארץ כנען, מדרום לצפון הוא מהלך. שארץ מצרים בדרומה של ארץ ישראל. כמו שמוכיח במסעות, ובגבולי הארץ:
ב וְאַבְרָ֖ם כָּבֵ֣ד מְאֹ֑ד בַּמִּקְנֶ֕ה בַּכֶּ֖סֶף וּבַזָּהָֽב׃
(ב) כבד מאד - טעון משאות:
ג וַיֵּ֨לֶךְ֙ לְמַסָּעָ֔יו[3] מִנֶּ֖גֶב וְעַד־בֵּֽית־אֵ֑ל עַד־הַמָּק֗וֹם אֲשֶׁר־הָ֨יָה שָׁ֤ם אָֽהֳלֹה֙ בַּתְּחִלָּ֔ה[4] בֵּ֥ין בֵּֽית־אֵ֖ל וּבֵ֥ין הָעָֽי׃
(ג) וילך למסעיו - כשחזר ממצרים לארץ כנען, היה הולך ולן באכסניות שלן בהם בהליכתו למצרים. למדך דרך ארץ, שלא ישנה אדם מאכסניה שלו. דבר אחר. בחזרתו, פרע הקפותיו:
מנגב - ארץ מצרים בדרומה של ארץ כנען[5]:
ד אֶל־מְקוֹם֙ הַמִּזְבֵּ֔חַ אֲשֶׁר־עָ֥שָׂה שָׁ֖ם בָּרִֽאשֹׁנָ֑ה וַיִּקְרָ֥א שָׁ֛ם אַבְרָ֖ם בְּשֵׁ֥ם יְהוָֽה׃
(ד) אשר עשה שם בראשנה ויקרא שם - ואשר קרא שם אברם, בשם ה'. וגם יש לומר, ויקרא שם, עכשיו, בשם ה':